Beledîyeya Peyasê di çarçoveya projeya darên mazî de, li Gêlê berû berhev kir. Ev berû dê bibin şitil û li dijî hişkesaliyê li tax û gundan bên çandin.
Beledîyeya Peyasê di çarçoveya projeya şitilên darên mazî de, li dora navçeya Gêlê berû berhev kir. Berûyên berhevkirî wê bên şitilandin û li tax, gund û mêrgan bên çandin.
Gerînendetiya Park û Baxçeyan a Beledîyeya Peyasê, projeya çandina darên mazî yên ku bi barana xwezayî mezin dibin, îsal jî berdewam dike. Alîkara hevşaredaran Gulîstan Nazlier, endamên meclîsa beledîyeyê, endamên Komîteya Ekolojiyê û xebatkarên Gerînendetiya Park û Baxçeyan li herêma çiyayî ya navçeya Gêlê berû berhev kirin.
Beledîyeyê par jî li herêma Çemê Reş a navçeya Çinarê 4 hezar berû berhev kiribûn û li qada sera û şitildanînê çandibû. Piştî ku şitil bigihîjin temenê 3-4 salî, wê li gund û cihên pêwîst bên veguhestin û çandin.

Armanc: Parastina nebatên xwezayî
Di daxuyaniya Gerînendetiya Park û Baxçeyan a li ser mijarê wiha hate gotin: “Darên mazî, tevî şert û mercên xwezayî yên dijwar jî, bi awayekî xwezayî û bi serê xwe li hin deverên herêma me şîn dibin. Wekî rêveberiyên herêmî, me ev înîsiyatîf bi van armancan da destpêkirin: Pêşxistina çandina cureyên li hemberî ziwabûnê berxwedêr û kêmav; parastin û geşkirina nebatên xwezayî yên herêmê; parastina çavkaniyên avê; û afirandina jîngeheke şînahîtir, berxwedêrtir û domdartir.”
Daxuyanî wiha berdewam dike: “Bi vê xebatê em piştgiriya pirrengiya biyolojîk dikin, tevkariyê li bikaranîna domdar a çavkaniyên avê dikin û ji bo hilberandina cureyên herêmî yên ku li hemberî hişkesaliyê li ber xwe didin, gaveke girîng avêtine. Em ê van berû û maziyên ku me berhev kirine tevlî pêvajoyên hilberînê bikin û tevkariyê li şitilandina riwekên li gorî avhewa û axa herêma me bikin.”







