Encamên dengdana li Pîreneyên Rojhilat ku di navbera 22yê hezîranê û 15ê tebaxê de hat lidarxistin, hat eşkerekirin. Di dengdanê de hewldanên alîgirên nasnameya katalanî bi ser neketin. Opsîyona “Pîreneyên Katalan” (Pirineus Catalans) ku ji aliyê saziyên çandî û partiyên alîgirên serxwebûna Katalonyayê ve dihat piştgirîkirin, 42%yê dengan wergirt. Opsîyona sêyem “Pîreneyên Deryaya Navîn” jî tenê 10,6%ê dengan wergirt. Dengdan ji ber tevlîbûna kêm rastî rexneyan hat; ji 384 hezar hilbijêrên qeydkirî tenê 38.178 kes (nêzîkî 10%) beşdarî dengdanê bûn.
Di destpêka vê pêvajoyê de navê “País Català” (Welatê Katalan) ku di anketan de xwedî piştgiriyeke 56%ê bû, ji ber fikarên ku wê ji aliyê Konseya Dewletê ya Fransayê ve bê redkirin, ji lîsteya dengdanê hatibû derxistin û ev yek bibû sedema nerazîbûnan.
📌 Encamên Fermî Yên Dengdanê
- Pîreneyên Rojhilat (Navê Heyî): %47 (Serketî)
- Pîreneyên Katalan: %42
- Pîreneyên Deryaya Navîn: %10,6
- Rêjeya Beşdarbûnê: %10 (38.178 / 384.000 hilbijêr)
Paşxaneya meseleyê
Seroka Konseya Departmanê Hermeline Malherbe piştî ragihandina encaman destnîşan kir ku “demokrasiyê axivî ye” û piştgirî da parastina navê ku ji Şoreşa Fransayê (sala 1790î) û vir ve tê bikaranîn. Şaredarê rastgir ê Perpignanê (bi katalanî Perpinya) Louis Aliot jî ku li dijî guherîna nav derdiket, destnîşan kir ku encam daxwaza parastina statukoyê nîşan dide. Li aliyê din, saziya Plataforma per la Llengua diyar kir ku rêjeya bilind a alîgirên “Pîreneyên Katalan” girêdana bihêz a xelkê herêmê ya bi nasnameya katalanî re eşkere dike.
Herêma Pîreneyên Rojhilat ku navendên mîna Roussillon, Cerdanya û Vallespirê di nav xwe de dihewîne, di sala 1659an de bi Peymana Pîreneyan, ji aliyê Îspanyayê ve ji bo Fransayê hatibû hiştin. Tevî ku ziman û çanda katalanî li herêmê hebûna xwe diparêze jî, nîqaşên li ser nasname û bikaranîna katalanî di beledîyeyan de salên dawî gurtir bûbûn.
