Şaredariya Peyasê di çarçoveya projeya şitilên darên mazî de, li dora navçeya Gêlê berû berhev kir. Berûyên berhevkirî dê bên şitilandin û li tax, gund û mêrgan bên çandin.
Gerînendetiya Park û Baxçeyan a Şaredariya Peyasê, projeya çandina darên mazî yên ku bi barana xwezayî mezin dibin û hewcedariya wan bi lênêrîneke taybet nîne, îsal jî berdewam dike. Alîkara hevşaredaran Gulîstan Nazlier, endamên meclîsa şaredariyê, endamên Komîteya Ekolojiyê û xebatkarên Gerînendetiya Park û Baxçeyan li herêma çiyayî ya navçeya Gêlê berû berhev kirin.
Şaredariyê par jî li herêma Çemê Reş a navçeya Çinarê 4 hezar berû berhev kiribû û li qada sera û şitildanînê ya şaredariyê çandibû. Piştî ku şitil digihîjin temenê 3-4 saliyê, dê li gund û cihên pêwîst bên veguhestin û çandin.
Armanc: Parastina nebatên xwezayî
Di daxuyaniya Gerînendetiya Park û Baxçeyan de hate gotin: “Darên mazî, tevî şert û mercên xwezayî yên dijwar jî, bi awayekî xwezayî û bi serê xwe li hin deverên herêma me şîn dibin. Wekî rêveberiyên herêmî, me ev înîsiyatîf bi van armancan da destpêkirin: Pêşxistina çandina cureyên li hemberî ziwabûnê berxwedêr û kêmav; parastin û geşkirina nebatên xwezayî yên herêmê; parastina çavkaniyên avê; û afirandina jîngeheke şînahîtir, berxwedêrtir û domdartir.”
