Parlementerê Partiya Karkeran ê Brîtanî Steve Witherden ji bo revandina serokê Venezuelayê Nicolas Maduro û jina wî Cilia Floresê, gotinên tûj ji serokê Amerîkayê Donald Trump re kir.
Steve Witherden Donald Trump wekî “kesekî jirêderketî” û “holîgan” rave kir û destnîşan kir ku Brîtanya dikare bibe hedefa rêzê ya serokê Amerîkayê.
Axaftina parlementerê Brîtanî ya li pêyî revandina serokê Venezuelayê Nicolas Maduro û jina wî Cilia Floresê, di demeke kurt de li hemû cîhanê belav bû û derket pêşiya hemû nûçeyan.
Steve Witherden dema axaftina xwe got:
“Serok Trump wekî gangsterekî krîmînal tev geriyaye, Venezuelaya ku welatekî serbixwe ye daye ber bombeyan, serokê wê yê dewletê û malbata wî revandiye û bûye sedemê gelek kuştinan.”
Parlementerê Brîtanî pê re jî weha pirs kir: “Di rêzê de kîjan welat heye? Meksîka? Panama? Greenland? Ev der?”
Steve Witherden pê re jî got:
“Dostên hêja hûn vêya qebûl dikin, eger em li hemberî jirêderketî û zordarên wekî Trump nesekinin, wê wêrek bibin û kiryarên xwe yên derqanûnî li deverên din jî pêk bînin.”
Li pêyî axaftina parlementerê Partiya Karkeran, Wezîra Karên Derve Yvette Cooper derket ser kursiyê û weha bersiv da gotinên Steve Witherden, got:
“Hikûmeta Brîtanyayê Maduro wekî kesekî serokê dewletê nas nake.”
Wezîrê di der barê kiryar û mudaxeleya Trump de çi gotinek nekir û çi şermezarî neda.
