Fermandariya Navendî ya DYAyê (CENTCOM) ragihand ku wan pêleke nû ya êrişên ezmanî biriye ser xaka Îranê. Ev êriş binesaziyên giring ên wekî balafirgeh, pir û stasyonên trênê dikin hedef. Li gorî agahiyên dawî, cara yekem e ku dengê teqînan li bakurê Îranê jî hatiye bihîstin.
Ev rageşî piştî hilweşîna peymana agirbestê ya berê û hatina rêberê nû yê Îranê, Mojtaba Xamaney gihîşt asteke nû ya krîtîk. Qesra Spî ragihand ku Îranê Memorandûma Hevfamkirinê (MoU) binpê kirîye û êrişî keştiyên bazirganî yên di Tengava Hurmizê re derbas dibûn kirîye. Herwiha CENTCOMê dorpêçeke deryayî ya tund (“dîwarê polayî”) li ser benderên Îranê sepand û dest danî ser keştiyên ku dixwestin ji dorpêçê rizgar bibin.
Îran êrişî welatên Kendavê kir
Di bersiva êrişên DYAyê de, artêşa Îranê sînorên şer berfireh kirin û fuzeyên xwe ber bi welatên cîran ên Kendavê ve şandin. Vê carê rasterast herêmên niştecîyan û saziyên sivîl bûn armanc.
Wezareta Parastinê ya Kuweytê ragihand ku wan zêdetirî 32 dronên îranî yên ku ber bi xaka wan ve dihatin, asteng kirine. Tevî parastina hewayî, hinek ji van dronan rasterast li saziyên sivîl û krîtîk ketine. Paşmayî û perçeyên dronên teqandî li ser taxên sivîl ên li Kuweytê ketine û bûne sedema zirarên mezin ên madî û tirsê di nav gel de.
Ne tenê Kuweyt, welatên wekî Urdun, Behreyn û Qeter jî bi êrişên fuzeyî yên Îranê re rûbirû man. Artêşa Urdunê sê fuzeyên balîstîk ên Îranê li esmanê xwe îmha kirin. Qeterê jî piştrast kir ku fuzeyên ber bi xaka wê ve dihatin asteng kirine. Ev êriş rasterast ewlehiya welatiyên sivîl ên li herêmê dixe xetereyê.
Bandora li ser aboriya cîhanî
Ev geşedanên dawî fikarên mezin li ser aboriya cîhanî çêdikin. Ji ber ku Tengava Hurmizê rêya sereke ya petrola cîhanê ye, dorpêça deryayî û şerê li herêmê dibe sedem ku li seranserê cîhanê bihayê benzîn û sotemeniyê bilind bibe. Ev jî bandorê li ser jiyana rojane ya bi mîlyonan sivîlan dike. Herçend danûstandinên dîplomatîk li pişt perdeyê berdewam dikin jî, xetereya şerekî giştî her ku diçe mezin dibe.
U.S. Marines from the 11th Marine Expeditionary Unit conduct a verification boarding aboard M/T Wen Yao in the Gulf of Oman, July 16.
As of today, American forces have redirected 3 commercial vessels trying to run the blockade, disabled 1 that didn’t comply, and boarded 1 to… pic.twitter.com/vbjArHuLaO
— U.S. Central Command (@CENTCOM) July 16, 2026
