Bi êrîşên di navbera Îran, Îsraîl û Hîzbûllahê de re şerê li Rojhilata Navîn berfirehtir dibe.
Êrîşên hewayî, êrîşên hewayî yên bêmirov û windahiyên zêde diyar dike ku şer û pevçûn bi awayakî dijwar ji Îsraîl û Îranê derbas kiriye.
Di dawiya heftê de Îsraîl û DYAyê bi awayekî koordîne êrîşî hedefên li Îranê kiribûn. Ji destpêka şer heta îro pevçûn bi awayekî lez berfireh bû. Medyaya herêmê diyar dike ku êrîşên fuzeyî û êrîşên hewayî yên bêmirov, êrîşên dersînor ên komên çekdar ên alîgiran û zêdebûna windahiyên sîvîlan dibe ku veguheze şerekî berfireh ê Rojhilata Navîn. Her wiha heman çavkanî diyar dike ku her ku diçe ev fikar zêdetir dibe.
Di nava çend rojan de şer û pevçûn ji Îran û Îsraîlê derbasî Lubnan û gelek welatên kendavê bû. Binesaziya enerjiyê hat hedefgirtin, balafirên leşkerî hatin xistin û sazî û dezgehên navneteweyî derbarê ewlehiya tesîsên nukleerê de fikarên xwe anîn zimên.
Welatên kendavê û DYAyê êrîşên Îranê şermaz kirin
Di daxuyaniya hevpar a Dewletên Yekbûyî yên Amerîka û çend welatên kendavê de “êrîşên hewayî yên bêmirov û fuzeyan ên bêperwa yên bê ser û ber” hate şermezarkirin. Û her wiha hat hişyarkirin ku ev êrîş dê îstîkrara herêmê tehdît bike.
Li gorî daxuyaniyê êrîş li Bahreyn, Iraq (herêma Kurdistanê jî têde), Urdun, Kuveyt, Umman, Qatar, Erebistana Suudî û Mîrnişînên Yekbûyî yên Ereban pêk hatiye.
Hîzbûllahê eniyeke nû vekir
Bi êrîşên fuzeyî û hewayî yên bêmirov ên Hîzbûllahê yên li hemberî Îsraîlê re roja duşemê di şer de eniyeke nû hat vekirin.
Komê ragihand ku ev êrîş ji bo tolhildana Rêberê olî yê Îranê Ayetullah Alî Hamaney hatiye kirin.
Îsraîlê jî bi êrîşên hewayî yên li hemberî Beyrûd û başûrê Lubnanê bersiv da wan êrîşan. Li gorî wezareta tendirustiyê ya Lubnanê herî kêm 31 kesî jiyana xwe ji dest daye û 149 kes jî birîndar bûne.
Li Îranê windahî hatin parvekirin
Heyva Sor a Îranê da zanîn ku ji roja şemiyê heta îro di encama êrîşên Îsraîl û DYAyê de li 131 bajarê Îranê herî kêm 555 kesî jiyana xwe ji dest daye.
Çawaniya windahiyên ku hatine diyarkirin dide xuyakirin ku bandora êrîşên ku hatine kirin ji hedefên leşkerî wêdetir e. Lê ev yek ji aliyê erkên serbixwe nehatiye piştrastkirin.
Li Kuweytê jetên DYAyê bi şaşî hatin xistin
Li gorî Fermandariya Navendî ya DYAyê (Centcom), di bûyerekî girîng a leşkerî de parastina hewayî ya Kuveytê sê balafirên şer ên F-15ê yên DYAyê ku tevlî operasyona Îranê bûbûn bi şaşî xistine xwarê.
Her şeş muretebatên wan jî bi awayekî biewle hatine xilaskirin û rewşa wan baş e. Ev bûyer nîşan dide ku li herêmê tevgera hewayî gelek zêde ye û ev yek jî dihêle ku di rewşên bi vî rengî de hin rîskên hesabkirinê derkevin pêş.
Fikarên ewlehiya nukleerê derket holê
Gerînendeyê Giştî yê Ajansa Enerjiya Atomê ya Navneteweyî Rafael Grossî hişyar kir ku dibe ku êrîşên li hemberî santralên sîvîl ên nukleerê bibe sedem ku darijîna radyolojîk pêk were û her wiha dibe ku pêwistî bi valakirina bajarên mezin jî hebe.
Lê belê di daxuyaniyê de hat gotin ku di êrîşên dawî yên DYA û îsraîlê de tesîsên nukleer ên Îranê tu xisar nedîtiye. Derbarê vê de tu emare tune ne.
